|
▼
交織
幻影交織，層劫迷惑，自性本空，森然羅列，受想行識，人生之網，性命過客。
一往情深，人生種種，一網打盡，蟬鳴鳥啼，花芳光影，交響出網中人的夢中曲。
疼
明明白白， 疼佇身軀，講袂清楚， 阮的感受，
拄才為你挽的在欉的雺霧，手底一放開， 煞一無所有。
疼， 是性命的面紗，掀起來進前， 攏是生份人；
疼， 是活跳跳的感受，疼過才知影性命的厚度。
幽幽仔疼， 沓沓仔體會，疼甲鑽心肝， 頓悟當下，
心肝頭勻勻仔捨離， 肉體一分一厘牽絲，
定定借『達文西』的刀， 用咱的血祭改，
送別年久月深、形影相隨的拖累。
疼， 是死神咧威脅， 抑是性命的恩典；
疼， 是痛苦的宣言， 或者性命的禮讚。
背向日頭， 干焦看會著家己的烏影，
驚疼， 凡勢加愈濟傷痕。
用心感受
疼， 是性命對咱的疼惜，
若無阿母斯當時驚天動地的疼，賜予咱寶貴的性命，
欲佗有現此時「渾然天成」的欲疼仔若毋疼，
掖一粒種子， 土地還咱花蕊。
疼過一改， 就是加活一改，每一份喜， 每一點悲，
每一絲的痛疼， 攏是天公伯仔對咱的疼痛，
佮上蓋慈悲的心情。
觀音
伊坐佇蓮花懸頂，觀音 觀看芸芸眾生的哀聲苦音；
伊坐佇蓮花懸頂，聽心 傾聽凡夫俗子的動念起心。
梵音，海潮音 救拔世間音；
真心，佛心 解脫肉團心，
伊倒駕慈航，聞聲救苦。
聞眾聲， 救眾苦，伊是慈悲的 觀音
|