▼
序 1
祖先的話,父母的心
.楊維哲(台灣大學數學系教授)
真早著知也(影)莊永明的名,這當然是對著新聞的副刊面頂讀來的,伊有真濟關係台灣的文章發表。後來,在林本源教育基金會舉辦個台灣研究研討會,時常會遇著,感覺伊真斯文古意,給伊變做好朋友,雖然伊是一個恬恬無愛講話的人。
最近,伊給我講欲出台灣俗語話的第三本冊,叫做《台灣好言吉句》,希望我給伊作序,我秉開第一頁,讀著第一句:「一人三子,六代千丁。」著感覺真心適,原來咱祖先著會曉馬爾薩斯的「人口論」,三的六次方是七百二十九,那有夠一千?古早人是查甫才算是「子」,一人三子,其實連查某算入去,就不止三個人了,所以,六代千丁,還是保守的算法。
「好言吉句」有真濟大家攏真熟的老先覺的話,親像:「乞食趕廟公」、「食米不知米價」、「龍交龍,鳳交鳳,隱龜交懂戇」……有的,雖然聽人講過,家己昧曉應用,親像:「長工望落雨,乞食望普度。」這款,冊裡實在昧少,咱那對頭到尾,讀過一遍,相信台灣優雅的話語,著會增加真濟!
我想要講,我的後生若昧曉台灣話,實在是我的見笑。頂年,我十八歲的後生欲出國去麻省理工學院的時陣,我交代伊愛將著《台灣金言玉語》、《台灣警世良言》兩本冊帶出去,這本《台灣好言吉句》若出版後,我也一定欲趕緊寄去乎伊,會讀抑未?我不知,但是,相信伊早慢會了解父母的心情,了解自己若想要做一個台灣人,伊一定會提起來好好讀,因為這套書,是真好的課本,未相硬,有趣味,又更順續講足濟的道理。
莊先生沒棄嫌,叫我給伊這本冊寫序言,我感覺著真光釆,冊內底有一句話:「人交陪攏是關公劉備,咱交陪是林投竹莿。」──果然如此,「人交陪攏是院長部長,咱交陪是永明金次。」實在昧磨!
|